Врховниот суд на САД не дозволи референдум за поделба на Калифорнија на три дела

87
cekan_sud

Врховниот суд на САД денеска реши да не дозволи во ноември да се гласа за предлогот за поделба на државата Калифорнија на три дела.

Калифорнискиот бизнисмен Тим Дрејпер ја финансираше кампањата за овој предлог да биде поставен пред гласачите на Калифорнија. Според предлогот, гласачите ќе решеа дали сакаат Калифорнија да се подели на Северна Калифорнија, која би го вклучувала Сан Франциско и Силиконската Долина, сегашниот главен град Сакраменто и северните пространства на државата; Јужна Калифорнија, како главно земјоделска држава и Калифорнија – густо населен крајбрежен појас од Лос Анџелес до Монтереј.

Врховниот суд ја прифати жалбата на неколку организации од Калифорнија, кои инсистираат дека таквото барање не може да се постави пред граѓаните на референдум, бидејќи со него значително се менува политичкото уредување на најнаселената американска сојузна држава.

Овој предлог има поддржувачи во двете најголеми политички партии во САД. Демократите протестираат поради тоа што Калифорнија, иако има 40 милиони жители, во Сенатот е застапена со само двајца сенатори, исто како далеку помалите држави како Вермонт или Мејн.

Од друга страна, Републиканската партија во овој предлог гледа можност да ги валоризира гласовите на руралните, конзервативни Калифорнијци кои живеат во внатрешноста на државата, и кои би можеле да бидат мнозинство барем во Јужна Калифорнија, и со тоа би помогнале во претседателските избори.

Според сегашниот модел, големото мнозинство што демократите го имаат во густо населените крајбрежни делови на Калифорнија ги поништува гласовите на конзервативните гласачи од руралната внатрешност и поради тоа демократите со сигурност можат да сметаат на сите 55 гласа што Калифорнија како држава ги носи при изборот на претседател.