Османи: Чувството на изневереност од страна на ЕУ не смее да нè оддалечи од европските вредности

653

Чувството на изневереност од страна на Европската Унија, не смее да нѐ оддалечи од европските вредности, не смее да нѐ оддалечи од патот на реформите, од патот на создавање пријатели од своите соседи, од патот на создавањето на функционално мултиетничко општество, од патот да создавање европска држава, по европски правила, стандарди и вредности, бидејќи нашиот пат бил, нашиот единствен пат е, и останува да биде европската перспектива и од тоа отстапување нема, рече вицепремиерот за европски прашања, Бујар Османи, на седницата на Комисијата за европски прашања, прва по неодамнешниот Самит на ЕУ.

Во своето обраќање, Османи накусо се осврна на резултатите кои Република Северна Македонија ги постигнала на полето на европските интеграции, поради кои, како што наведе Османи, земјата со право очекуваше старт на преговорите.

„Без разлика на сегашната состојба Република Северна Македонија е навистина пример на Балканот за тоа како се гради функционална мултиетничка демократија, со почитување на европските принципи на еднаквост, на солидарност, на компромиси, земја која како ретко која друга може да се пофали дека на правилен начин ги затвори сите поголеми отворени политички прашања, независно дали се тоа односите со соседите, или внатрешните односи меѓу различните етнички заедници, меѓу различните политички, социјални или општествени целини“, истакна Османи.