Македонската репрезентација во хокеј на мраз одлично го стартуваше настапот на „Развојниот куп“ што се одржува во Германија, на кој учествуваат земјите кои немаат затворена арена за хокеј.
„Црвено-жолтите“ во првото коло за противник ја имаа Ирска, селекција што важеше за главен фаворит за првото место, но Македонија со одлична игра славеше со 9-6. Македонските хокеари ја добија првата третина со 3-2, потоа беа подобри и во вториот период (4-3), крунисувајќи ја победата со два постигнати гола во последните 20 минути игра.
Во главна улога беше Јуре Стопар со шест гола, а по еднаш меѓу стрелците се запишаа Кристијан Ташевски, Андреј Василев и Самуел Наумовски. Тренер на репрезентацијата на Македонија е Ѓорги Грчев.
Македонија и вториот натпревар го игра денеска, а за противник во 19 часот ќе ја има селекцијата на Андора.
